أنواع الحقيقة

العنوان يبدو غريب شوية لإنه بيفترض إنه للحقيقة أنواع ، و دة هوة اللي المقالة دي بتحاول توضحه .. عموما المقالة دي أساستها مبنية على العمل دة بفروعه من المقالات التانية ( المعنون بعنوان " خلاصة النظرة المختصرة لرؤية العالم " )

https://www.facebook.com/notes/serag-hasouna/%D8%AE%D9%84%D8%A7%D8%B5%D8%A9-%D8%A7%D9%84%D9%86%D8%B8%D8%B1%D8%A9-%D8%A7%D9%84%D9%85%D8%AE%D8%AA%D8%B5%D8%B1%D8%A9-%D9%84%D8%B1%D8%A4%D9%8A%D8%A9-%D8%A7%D9%84%D8%B9%D8%A7%D9%84%D9%85/692532970854712

______

*أولا: مقدمة :-*

مفهوم الحقيقة هوة من المفاهيم البديهية عندنا احنا البشر دلوقتي ، مع اختلافاتنا و اتفاقاتنا ف تفاصيل دنيتنا إلا إنه نادر ما بنلاقي اختلاف على وجود مفهوم الحقيقة من عدمه ، و غالبا لو واحد قاللك إنه مفيش مفهوم للحقيقة هنتهمه بالجنون.

لو بصيت حواليك أو لو بتدعبس كدة و تشوف وسط الناس اللي بنسميهم مثقفين بالذات هتلاقي طراطيش كلام بتلاقي ف وسطه الكلمة دي " البحث عن الحقيقة " .. الكلمة بتاخد شكل متلمع ع الأغلب ، يمكن لإنه معنى و مفهوم الحقيقة عندنا بيقرب من تطبيقنا العملي اليومي للمركبات اللي هوة عنصر فيها بشكل متكرر و رئيسي .. و عموما خلونا نحط الفرضية دي ، مفهوم الحقيقة جذره يرجع للحالة الإدراكية للشخص ، مفهوم الحقيقة مش منفصل عنه - كمنبع - .. هتلاقي رد من اللي بياخدوا وجهات النظر الـ objective أو الموضوعية على دة - و أنا غالبا منهم - و هوة إنه الحقيقة مينفعش تتربط بالناس ، و هما بيقولوا كدة عشان يمنعوا أو يقللوا من إنتاج الأفكار اللي بتنحرف عن رصد الطبيعة و التعامل معاها .. قرار الناس دي يعتبر قرار جيد من الناحية العملية رغم إنه بيفشل برا الأوساط اللي هما بينتموا ليها من الناحية الفكرية ، قرارهم جيد من ناحية إنه أي انحراف عن التوجه ناحية تفهم الطبيعة و تفهمها بالأشكال الغير عملية يتم إبعاده ، ع الأقل حتى إبعاده عن طرق تحركاتهم ، زي الإيمان بإنه صورة ميتافيزيقية معينة هيا حقيقة إجزامية لا يجب بل و من المحرم الشك فيها ، بالإضافة لإدخال الصور دي في تفسيرات لأحداث طبيعية عادية في حياتنا اليومية .. و عموما من هنا هحط الفرضية التانية و اللي بتقول (( لقد فشل مفهوم الحقيقة القائم حاليا في تحقيق إقترابٍ جمعيٍ للبشر نحو تفهم الطبيعة )) ، و بالتالي هيكون الوثوق في أي منتج يحمل في طياته استخدام لمفهوم الحقيقة مهما كان نوعه نوع من الهراء .. الفرضية التانية بالعامية بتقول إنه مفهوم الحقيقة فشل ف إنه يساعد البشر كلهم ف إنهم يقربوا أكتر من فهم الطبيعة .. و دة يمكن هوة اللي يفتحلنا باب الاستغراب من مفهوم الحقيقة ذات نفسه ، إيه اللي خلاه يكون ناجح مع ناس و يساعدهم في تفهم الطبيعة من حواليهم و ف نفس الوقت نلاقيه بيتجه بناس تانية ناحية الإبتعاد عن رؤية الطبيعة من حيث هي طبيعية.

هجيب عموما هنا خلاصة اللي اتقال فوق هنا :

1- الفرضية الأولى : (( يرجع جذر مفهوم الحقيقة لحالة الفرد البشري الإدراكية ، و يمثل ذلك المفهوم انعكاسا لنمطٍ منها ))

2- الفرضية الثانية : (( لقد فشل مفهوم الحقيقة القائم حاليا في تحقيق إقترابٍ جمعيٍ للبشر نحو تفهم الطبيعة ))

3- الفرضية الثالثة : (( يرجع جذر مفهوم الحقيقة لخبرات البشر في المستوى الماكرومتري الذي نعيش فيه ))

4- الفرضية الرابعة : (( يمثل التشابه التقارب من موضع حيود الإدراك البشري ، و يمثل التطابق موضع حيود الإدراك البشري ))

_______

*ثانيا:أنواع الحقيقة:-*

في المقدمة وضحنا ملاحظة مهمة ، و هيا إنه امتلاكك لمفهوم الحقيقة مش ضمانة ليك إنك هتتحرك ف طريق يساعدك تتفهم الطبيعة من حواليك ، دة طبعا بدرجة كبيرة عشان حواليك هتلاقي " استهبال " ناس مش قليلين - من حيث العدد - بتحطه ع العرش .. و هتلاقي زي ما قلنا قبل كدة إنه مجرد نقدك للصور اللي هما حاطين فيها شوية من مفهوم الحقيقة لتكوين " الاستهبال " هيخليهم يوصفوك بالجنون .. و من هنا فمفهوم الحقيقة سهل نتخيله بشكل metaphorically أو مجازي على إنه عامل زي العنصر الكيميائي اللي بينضاف على بقية الخلطة و بيفضل تأثير أجزائه موجود جوة الخلطة مهما اختلف شكل الناتج.

الحقيقة ليها أبناء شرعيين ( و اللي هما يعتبروا من أنواع الحقيقة ) و هما كالآتي:-

1-الـ axiom : و دة هوة أكتر ابن شبه أبوه وسط اخواته الباقيين ، طريقة عمله قريبة جدا من طريقة عمل أبوه ، هوة بيظهر كما لو كان غير قابل للإثبات ، و بيظهر كما لو كان حقيقة مطلقة .. طبعا الظهور دة بيكون بشكل local جوة بيئة العمل بتاعته ، و طبعا الراصد اللي بيكون اتعلم كويس غالبا هتلاقيه عارف إنه الـ axiom بياخد شكل أبوه لكن عارف إنه له حدود بيتحرك تأثيره فيها.

2- الـ hypothesis أو الفرضية : و هوة عبارة عن إبن مش متطعم كويس زي أخوه الـ axiom ، بالتالي هوة وارد أكتر إنه يموت بدري أو يتطعم أو يتعملله عملية جراحية ، و اللذيذ في الأمر إننا بنعتمد عليه بشكل كثيف لو احنا مهتمين بالدقة و لو احنا مهتمين بإننا نكون open minded على الطبيعة من حوالينا ، و بيفضل يتولد منه و يموت لغاية أما يطلع أكتر hypothesis عنده مناعة و يقدر يكمل حياته .. و ممكن من ناحية تانية نقول إنه الـ hypothesis يعتبر ابن للـ axiom ، على اعتبار إنه ميلاده يعتمد على تطبيق ما ينص عليه الـ axiomatic system اللي بيتولد على أساساته الـ hypothesis دة.

3- الجمل التأكيدية : و هيا لا يتم معاملتها على إنها فرضية مفتوحة للتعديل بحسب المرصود من الطبيعة و الوقائع ، و هيا برده بتحاول تلبس ثوب الحقيقة المطلقة .. ممكن نعتبرها برده من أبناء الـ axiom .

4- النفي أو الـ negation : و هوة أحد أهم أبناء مفهوم الحقيقة ، و هو حامل السيف المضرج بالدماء ، مهمته أصلا تختص بالقتل و الاستبعاد.

5- التجريب : و هو الصورة التطبيقية الأرضية المباشرة لمفهوم الحقيقة .. يمكن نفترض بإنه هوة اللي اتولد منه مفهوم الحقيقة القائم دلوقتي طبقا لخبرة البشر في المستوى الماكرومتري اللي احنا بنرصده غالبا ، و ممكن نفترض بإنه هوة ابن لمفهوم الحقيقة ، و في الحالتين ف التصورين دول ممكن ينفعوا معبعض يكونوا السؤال الشبيه بالسؤال دة " هل عبرت الدجاجة الطريق أم هل عبر الطريق الدجاجة ؟ " .

.....

hint: إحنا البشر دلوقتي شئنا أم أبينا، عايزين أو مش عايزين، عندنا ميزة الـ abstract realization ، صحيح إنه أساساتها ممكن تكون متاخدة من العالم الملموس إلا إنها شاطحة و بعيدة للدرجة اللي بتخلي عملية تتبعها وسط كتابات هيامية رومانسية أو أشعار أو تصورات من اللي بيتم تسميتها بالروحانيات مثلا أمر مش سهل في البداية ، رغم إنها أساسا منتجات لاستخدام الـ abstract realization لأصحابها .. النوع دة من التصور بيخلينا كائنات تهتم بالتنبؤ بالمستقبل سواء كان قريب جدا أو بعيد ، و بتساعدنا نقدر نرسم صورة الماضي بنفس طريقة تنبؤنا بالمستقبل ، أكننا بنتنبأ بالماضي برده باستخدام ذاكرتنا و اللي بنربطها بالماضي برده ، لذيذ مش كدة ؟! .. كمان الـ abstract realization بيساعدنا نعرف نتصور نفسينا و ذواتنا و بيساعدنا نتفهم نوايانا و نتوقع نوايا غيرنا.

خليك فاكر إنه مفهوم الحقيقة لوحده مش ضمانة ليك إنك بتتحرك ف طريق يساعدك تتفهم الطبيعة من حواليك .. خليك فاكر الـ abstract realization اللي عندك و ركز عليه و أدمجه مع ملاحظاتك و استمتع بشطحاته و شوف اللمسة الأرضية فيه وصلت لإيه .. خليك فاكر كمان إنه مفهوم الحقيقة هوة دليل على الحيود الإدراكي الطبيعي اللي عندنا احنا البشر طبقا للي قولناه في الفرضية الرابعة - و اللي من ناحية براجماتية مع الطبيعة هنحتاج نستغله - .. خليك فاكر إنه الـ abstract realization بيسرق شغله أصلا من الطبيعة المنظورة و اللي البشر اللي زيينا اللي عاشوا قبلنا بآلاف السنين كانوا معتمدين عليها في حياتهم ، و بالتالي حتى مفهوم الحقيقة ذات نفسه يعتبر ناتج لخبرة البشر التراكمية دي و اللي على مستوى رصد ماكرومتري - هنسميه مجازا بـ "مستوى رصد كوباية الشاي " - .. و يمكن عشان كدة لسة بتواجهنا صعوبات في تفهم و استيعاب أمور زي الـ mathematics و البيئات الصغيرة جدا أو السريعة جدا أو صاحبة الـ immense population أو البيئات الحيوية المعقدة أو الأنظمة المعقدة أو ميكانيكا الكم.

بل إنه انت تقدر تقول بإنه مفاهيمنا اللي عايشة في العالم الـ abstract سارقة مظهرها و شكلها و حواراتها من مستوى رصد كوباية الشاي .. و الجميل بقى إنه على أرضيتها هتلاقي ناس عرفت توصل للتعامل على المستوى اللي بتشتغل فيه حاجة زي ميكانيكا الكم .. ببساطة كل ما عليك هوة إنك "" تلعب و تستمتع "".

_______

Enjoy